ગુજરાત હાઈકોર્ટે રાજ્યના બિસ્માર રસ્તા અને ટ્રાફિક મુદ્દે મુખ્ય સચિવ અને AMCના કમિશનર નો ઉધડો લીધો, શા માટે જેલમાં ન મોકલવા જોઈએ ? તેવો પ્રશ્ન કર્યો..

બિસ્માર રસ્તા અને ટ્રાફિક મુદ્દે મુખ્ય સચિવ અને AMCના કમિશનર નો ઉધડો લીધો

અમદાવાદ- મી.રીપોર્ટર, ૧૮મી નવેમ્બર

ગુજરાત હાઈકોર્ટે  રાજ્યમાં બિસ્માર રસ્તાઓ અને ટ્રાફિક મામલે રાજ્યના વર્તમાન મુખ્ય સચિવ ડો. જે એન સિંઘનો ઉધડો લીધો છે.  એટલું જ નહિ પણ ગુજરાત હાઈકોર્ટે તેમની સાથે જ અમદાવાદ મ્યુનિસિપલ કોર્પોરેશનના કમિશનર વિજય નેહરાની પણ ઝાટકણી કાઢી છે. હાઈકોર્ટે  બન્ને ની ઝાટકણી કાઢતા બંનેને કારણદર્શક નોટિસ ફટકારી કહ્યું છે કે, ‘તમને શા માટે જેલમાં ન મોકલવા જોઈએ ?’

હાઈકોર્ટના આદેશની વારંવાર અવમાનના, ઉપરાંત ટ્રાફિક અને બિસ્માર રસ્તાની સમસ્યાનું નિરાકરણ લાવવામાં સરકાર નિષ્ફળ રહેતા ગુજરાત હાઈકોર્ટે મુખ્ય સચિવ અને મ્યુનિસિપલ કમિશનરને જવાબ રજૂ કરવા આદેશ આપ્યો છે.

રાજ્ય સરકાર સામે ગુજરાત હાઈકોર્ટમાં કન્ટેમ્પ્ટ અરજી થઈ હતી. જે સંદર્ભે ગુજરાત હાઈકોર્ટે આકરું વલણ અપનાવ્યું છે. હાઈકોર્ટે 23 ઓક્ટોબર, 2019 એ ઈસ્યૂ કરેલી નોટિસમાં મુખ્ય સચિવ અને કોર્પોરેશનના કમિશનરને 28મી નવેમ્બર, 2019એ કોર્ટમાં મુખ્ય સચિવ અને અમદાવાદ ના મ્યુનિસિપલ કમિશનરને જાતે કે તેમના વકીલને હાજર રહેવા અને તે પછી તમારી સામેના આ કેસનો ચુકાદો ન આવે ત્યાં સુધી જેટલી સુનાવણી થાય તેમાં હાજર રહેવા આદેશ આપ્યો છે.

હાઈકોર્ટે પોતાની નોટિસમાં મુખ્ય સચિવ અને મ્યુનિસિપલ કમિશનરને 28મી નવેમ્બરે થનારી સુનાવણીમાં હાજર રહી શા માટે તમને જેલમાં ન મોકલવા જોઈએ તેનો ખુલાસો કરવા કહ્યું છે.