ડૉક્ટર ન મળતા TTEએ કરાવી ડિલિવરી, રેલવેએ કરી પ્રશંસા

Spread the love

મિ.રિપોર્ટર, 15મી જૂન

દિલ્હીના એક TTEએ ગુરુવાર-શુક્રવારની રાતે સાબિત કરી દેખાડ્યું કે માનવતા હજુ પણ જીવે છે. દિલ્હી ડિવીઝનના TTE એચ એસ રાણાએ ટ્રેનમાં જ એક ગર્ભવતી મહિલાની ડિલિવરી કરવામાં મદદ કરી.

જાણવા મળેલી વિગતો અનુસાર, મહિલાને રાતના સમયે ટ્રેનમાં અચાનક પ્રસવ પીડા થવા લાગી, આથી રાણે પહેલા તો ટ્રેનમાં ડૉક્ટરની તપાસ કરી. તેમણે ટિકિટ લિસ્ટ દ્વારા આખી ટ્રેનમાં કોઈ ડૉક્ટર મુસાફરી કરી રહ્યાં છે કે કેમ તે જાણવાનો પ્રયત્ન કર્યો પણ તેમને એવું કોઈ ન મળ્યું. જ્યારે ડૉક્ટરને શોધવાના તમામ પ્રયત્ન નિષ્ફળ ગયા ત્યારે તેમણે પોતે જ મહિલાની પ્રસૂતિ કરાવવાનો નિર્ણય લીધો.

મહિલા મુસાફરે એક સ્વસ્થ બાળકને જન્મ આપ્યો જ્યારબાદ ટ્રેનમાં ઉત્સાહનું મોજું ફરી વળ્યું. રાણાના આ કામથી ભારતીય રેલવે મંત્રાલય ખૂબ ખુશ છે. રેલવેએ ટ્વીટર પર ફોટો શેર કરતા લખ્યું, ‘દિલ્હી ડિવીઝનના TTE એચ એસ રાણાએ સહ યાત્રીઓ સાથે રાતે એક મહિલાને પ્રસવ કરાવવામાં મદદ કરી, કારણ કે ટ્રેનમાં કોઈ ડૉક્ટર ઉપલબ્ધ નહોતું. અમને આ માનવીય કાર્ય પર ગર્વ છે.’