UA-117440594-1
Spread the love

ડી.ઇ.ઓ.એ આપેલી ખાત્રી પૂરી ન કરતા કોંગ્રેસ ઉગ્ર આંદોલનના માર્ગે : પોલીસ દ્વારા શહેર કોંગ્રેસ પ્રમુખ પ્રશાંત પટેલ (ટીકો), ચંદ્રકાંત શ્રીવાસ્તવ (ભથ્થુ), પપ્પુ વાઘેલા સહિત 30 કાર્યકરોની અટકાયત કરી 

વડોદરા- એજ્યુકેશન, મિ.રિપોર્ટર, ૨જી જુલાઈ

રાઇટ ટુ એજ્યુકેશન એક્ટ (આર.ટી.ઇ.) હેઠળ પ્રવેશથી વંચિત રહેલા વિદ્યાર્થીઓને પ્રવેશ આપવાની માંગ સાથે આજે ડી.ઇ.ઓ. કચેરી ખાતે શહેર કોંગ્રેસ આવેદનપત્ર આપવા માટે ગયું હતું. પરંતુ, ડી.ઇ.ઓ. કચેરીમાં ન મળતા કોંગ્રેસ દ્વારા ચક્કાજામ કરવામાં આવ્યો હતો. પોલીસે ચક્કાજામ કરનાર શહેર કોંગ્રેસ પ્રમુખ સહિત 30 મહિલા-પુરૂષ કાર્યકરોની અટકાયત કરી હતી.

શહેર કોંગ્રેસ પ્રમુખ પ્રશાંત પટેલે જણાવ્યું હતું કે, આર.ટી.ઇ. એક્ટ હેઠળ પ્રવેશથી વંચિત રહેલા વિદ્યાર્થીઓને સ્કૂલોમાં પ્રવેશ આપવા માટે જિલ્લા શિક્ષણાધિકારીને ત્રણ દિવસે પૂર્વે આવેદન પત્ર આપવામાં આવ્યું હતું. તે સમયે ડી.ઇ.ઓ.એ તા.2 જી જુલાઇના રોજ બાકી રહેલા વિદ્યાર્થીઓની યાદી મુકવાની ખાતરી આપી હતી. પરંતુ, આજે પણ ડી.ઇ.ઓ. કચેરી દ્વારા યાદી મુકવામાં આવી નથી.

શહેર કોંગ્રેસ દ્વારા પ્રવેશથી વંચિત વિદ્યાર્થીઓને ન્યાય અપાવવા માટે કચેરીમાં ગયા હતા. પરંતુ, ડી.ઇ.ઓ. ન મળતા ન છૂટકે કોંગ્રેસને ઉગ્ર આંદોલનનો માર્ગ અપનાવવાની ફરજ પડી છે. જેના ભાગરૂપ કચેરી નજીક ચક્કાજામ કરવામાં આવ્યો હતો. જેમાં પોલીસ તંત્ર દ્વારા કોંગ્રેસના આંદોલનને કચડી નાંખવા માટે મહિલા-પુરૂષ સહિત 30 કાર્યકરોની અટકાયત કરવામાં આવી છે. પરંતુ, જ્યાં સુધી પ્રવેશથી વંચિત રહેલા વિદ્યાર્થીઓને પ્રવેશ આપવામાં નહિં આવે ત્યાં સુધી કોંગ્રેસ દ્વારા આંદોલન ચાલુ રહેશે.

શહેર કોંગ્રેસ દ્વારા ડી.ઇ.ઓ. કચેરી પાસે એ.પી.એમ.સી. ચાર રસ્તા પાસે ચક્કાજામ કરતા ટ્રાફિક જામ થઇ ગયો હતો. ટ્રાફિક જામ થઇ જતાં, વાહનોની લાંબી કતારો લાગી ગઇ હતી. પોલીસ દ્વારા શહેર કોંગ્રેસ પ્રમુખ પ્રશાંત પટેલ (ટીકો), ચંદ્રકાંત શ્રીવાસ્તવ (ભથ્થુ), પપ્પુ વાઘેલા સહિત 30 કાર્યકરોની અટકાયત કરી હતી. પોલીસ તંત્ર દ્વારા કોંગ્રેસ કાર્યકરોની અટકાયત કરવામાં આવતા કાર્યકરો દ્વારા સરકાર વિરૂધ્ધ ભારે સુત્રોચ્ચાર કરવામાં આવ્યો હતો. આ સાથે ડી.ઇ.ઓ. કચેરી વિરૂધ્ધ પણ સુત્રોચ્ચાર કરવામાં આવ્યો હતો.

You missed

error: Content is protected !!